1ܦܪܸܫܠܲܢ ܡܸܢܲܝܗܝ؛ ܘܛܪܹܐܠܲܢ ܕܘܼܙ ܘܐ݇ܬܹܐܠܲܢ ܠܩܘܿܣ ܓܵܙܲܪܬܵܐ؛ ܘܒܝܵܘܡܵܐ ܐ݇ܚܹܪ݇ܢܵܐ ܐَܬܹܐܠܲܢ ܠܪܘܿܕܘܿܣ؛ ܘܡ̣ܢ ܬܵܡܵܐ ܠܦܵܛܵܪܵܐ. 2ܘܡܘܼܫ݇ܟ̰ܸܚܠܲܢ ܬܵܡܵܐ ܓܵܡܝܼ ܕܒܹܐܙܵܠܵܐ ܠܦܹܘܢܝܼܩܹܐ؛ ܘܐَܣܸܩܠܲܢ ܓܵܘܵܗ̇ ܘܛܪܹܐܠܲܢ. 3ܘܡܛܹܐܠܲܢ ܗܲܠ ܠܟܸܣ ܩܹܘܦܪܘܿܣ ܓܵܙܲܪܬܵܐ؛ ܘܫܒܼܝܼܩܠܲܢ ܠܣܸܡܵܠܵܐ؛ ܘܛܪܹܐܠܲܢ ܠܣܘܼܪܝܼܵܐ؛ ܘܡ̣ܢ ܬܵܡܵܐ ܡܛܹܐܠܲܢ ܠܨܘܿܪ؛ ܣܵܒܵܒ ܬܵܡܵܐ ܐܝܼܬܿ ܗَܘܵܐ ܕܓܵܡܝܼ ܣܵܦܩܵܐ ܗَܘܵܐ ܛܲܥܢܘܼܗ̇. 4ܘܟܲܕ ܡܘܼܫ݇ܟ̰ܸܚܠܲܢ ܬܵܡܵܐ ܬܲܠܡܝܼܕܹ̈ܐ؛ ܦܝܼܫܠܲܢ ܠܟܸܣܠܵܝܗܝ ܫܲܒܼܥܵܐ ܝܵܘܡܵܢܹ̈ܐ؛ ܘܐܲܢܹܐ ܐ݇ܡܸܪܗܘܿܢ ܠܦܵܘܠܘܿܣ ܒܪܘܼܚܵܐ؛ ܕܠܵܐ ܐܵܙܠَܝܼ ܠܐܘܿܪܸܫܠܸܡ. 5ܘܒܵܬَܪ ܐܵܢܝܼ ܝܵܘܡܵܢܹ̈ܐ؛ ܦܠܸܛܠܲܢ ܕܐܵܙܵܠ݇ܚ ܒܐܘܼܪܚܵܐ؛ ܘܡܲܦܫܘܼܛܲܢ ܝܼܗَܘܵܘ ܟܠܵܝܗܝ؛ ܐܵܢܝܼ ܘܒܲܟܼܬܵܬܵܝ̈ܗܝ ܘܒܢܘܿܢ̈ܵܝܗܝ؛ ܗܲܠ ܠܒܲܕܲܪ ܡ̣ܢ ܡܕܝܼܢ݇ܬܵܐ؛ ܘܒܪܸܟ̇ܠܲܢ ܥܲܠ ܒܘܼܪ̈ܟܵܟܲܢ ܥܲܠ ܣܸܦܬܵܐ ܕܝܵܡܵܐ؛ ܘܨܘܼܠܹܐܠܲܢ. 6ܘܢܫܸܩܠܲܢ ܠܸܚܕܵܕܹ̈ܐ؛ ܘܐ݇ܣܸܩܠܲܢ ܠܓܵܡܝܼ؛ ܘܐܵܢܝܼ ܕܸܪܗܘܿܢ ܠܒܵܬܵܝ̈ܗܝ. 7ܐܝܼܢܵܐ ܐܲܚܢܲܢ ܛܪܹܐܠܲܢ ܡ̣ܢ ܨܘܿܪ؛ ܡܛܹܐܠܲܢ ܠܥܲܟܿܘܿ ܡܕܝܼܢَܬܵܐ؛ ܘܝܘܼܗَܒܼܸܠܲܢ ܫܠܵܡܵܐ ܠܐܲܚܘܿܢܘܵܬܹ̈ܐ ܕܬܵܡܵܐ؛ ܘܫܪܹܐܠܲܢ ܠܟܸܣܠܵܝܗܝ ܚܲܕ݇ ܝܵܘܡܵܐ. 8ܘܒܝܵܘܡܵܐ ܐ݇ܚܹܪ݇ܢܵܐ؛ ܦܠܸܛܠܲܢ ܘܐ݇ܬܹܐܠܲܢ ܠܩܹܣܲܪܝܵܐ ܥܒܼܸܪܲܢ ܫܪܹܐܠܲܢ ܓܵܘ ܒܲܝܬܹܗ ܕܦܝܼܠܝܼܦܘܿܣ ܡܲܟܪܸܙܵܢܵܐ؛ ܗ̇ܘ ܕܝܼܗَܘܵܐ ܡ̣ܢ ܫܲܒܼܥܵܐ. 9ܘܐܝܼܬ ܗَܘܵܐ ܠܹܗ ܐܲܪܒܥܵܐ ܒܢܵܬܹ̈ܐ؛ ܒܬܘܼܠܵܬܹ̈ܐ؛ ܕܟܹܐ ܢܵܒ̇ܝܼ ܗَܘܵܘ. 10ܘܟܲܕ ܦܸܫܠܲܢ ܬܵܡܵܐ ܪܵܒܵܐ ܝܵܘܡܵܢܹ̈ܐ؛ ܨܠܹܐܠܹܗ ܡ̣ܢ ܝܼܗܘܼܕ ܚܲܕ݇ ܢܒܼܝܼܵܐ ܕܫܸܡܹܗ ܐܵܓܼܵܒܼܘܿܣ. 11ܘܥܒܼܸܪܹܗ ܠܟܸܣܠܲܢ؛ ܘܫܩܸܠܹܗ ܚܵܨܵܐ ܕܦܵܘܠܘܿܣ؛ ܘܐ݇ܣܸܪܹܗ ܐܝܼܕܵܬܹ̈ܐ ܘܐܲܩܠܵܬܹ̈ܐ ܕܓܵܢܹܗ؛ ܘܐَܡܸܪܹܗ؛ ܗܲܕܟܼܵܐ ܒܹܐܡܵܪܵܐ ܝ݇ܠܹܗ ܪܘܼܚܵܐ ܕܩܘܼܕܫܵܐ؛ ܐ݇ܢܵܫܵܐ ܡܵܪܵܐ ܕܐܵܗܵܐ ܚܵܨܵܐ ܗܲܕܟܼܵܐ ܒܸܬ ܐܵܣܪܝܼ ܠܹܗ ܝܗ݇ܘܼܕܵܝܹ̈ܐ ܓܵܘ ܐܘܿܪܸܫܠܸܡ؛ ܘܒܸܬ ܣܵܦܝܼܠܹܗ ܒܐܝܼܕܹ̈ܐ ܕܛܵܝܸܦܹ̈ܐ. 12ܘܟܲܕ ܐܲܢܹܐ ܗܹܡܸܙܡܵܢܹ̈ܐ ܫܡܸܥܠܲܢ؛ ܦܘܼܪܦܸܠܲܢ ܒܝܼܹܗ ܐܲܚܢܲܢ ܘܒܢܲܝ̈ ܕܗ̇ܝ ܕܘܼܟܵܐ؛ ܕܠܵܐ ܐܵܙܸܠ ܠܐܘܿܪܸܫܠܸܡ. 13ܗ̇ܝܓܵܗ ܦܵܘܠܘܿܣ ܓ̰ܘܼܘܸܒܠܹܗ؛ ܡܘܼܕܝܼ ܒܸܥܒܼܵܕܵܐ ܝ݇ܬܘܿܢ ܕܒܸܒܟܼܵܝܵܐ ܝ݇ܬܘܿܢ ܘܒܸܬܒܼܵܪܵܐ ܝ݇ܬܘܿܢ ܠܠܸܒܝܼ؛ ܣܵܒܵܒ ܐܵܢܵܐ ܗܕܝܼܪܵܐ ܝܘܸܢ ܠܵܐ ܐܲܚܟ̰ܝܼ ܕܦܵܝܫܸܢ ܐَܣܝܼܪܵܐ؛ ܐܸܠܵܐ ܐܘܼܦ ܕܡܵܝܬܸܢ ܒܐܘܿܪܸܫܠܸܡ ܩܵܐ ܒܘܼܬܿ ܕܫܸܡܹܗ ܕܡܵܪܲܢ ܝܼܫܘܿܥ ܡܫܝܼܚܵܐ. 14ܘܟܲܕ ܠܵܐ ܡܘܼܨܝܸܬܠܹܗ ܐܸܠܲܢ؛ ܫܠܹܐܠܲܢ؛ ܘܐ݇ܡܸܪܲܢ؛ ܨܸܒܼܝܵܢܹܗ ܕܡܵܪܲܢ ܗܵܘܹܐ. 15ܘܒܵܬ݇ܪ ܐܲܢܹܐ ܝܵܘܡܵܢܹ̈ܐ ܗܘܼܕܸܪܲܢ ܘܐ݇ܣܸܩܠܲܢ ܠܐܘܿܪܸܫܠܸܡ. 16ܘܐ݇ܬܹܐܠܗܘܿܢ ܥܲܡܲܢ ܐ݇ܢܵܫܹ̈ܐ ܬܲܠܡܝܼܕܹ̈ܐ ܡ̣ܢ ܩܹܣܲܪܝܵܐ؛ ܟܲܕ ܠܵܒܘܿܠܹܐ ܥܲܡܵܝܗܝ ܚܲܕ݇ ܬܲܠܡܝܼܕܵܐ ܩܵܕ݇ܡܵܝܵܐ ܕܫܸܡܹܗ ܗَܘܵܐ ܡܢܵܣܘܿܢ ܕܡ̣ܢ ܩܹܘܦܪܘܿܣ؛ ܕܡܲܫܪܹܗ ܠܲܢ ܓܵܘ ܒܲܝܬܹܗ. 17ܘܟܲܕ ܐ݇ܬܹܐܠܲܢ ܠܐܘܿܪܸܫܠܸܡ؛ ܩܲܡ ܩܵܒ̇ܠܝܼܠܲܢ ܐܲܚܘܿܢܘܵܬܹ̈ܐ ܒܚܸܕܝܘܼܬܵܐ. 18ܘܒܝܵܘܡܵܐ ܐ݇ܚܹܪ݇ܢܵܐ ܥܒܼܸܪܲܢ ܥܲܡ ܦܵܘܠܘܿܣ ܠܟܸܣ ܝܲܥܩܘܿܒܼ؛ ܟܲܕ ܐܝܼܬ ܗَܘܵܘ ܠܟܸܣܠܹܗ ܟܠܵܝܗܝ ܚܘܵܪ̈ܕܸܩܢܹܐ. 19ܘܕܪܹܐܠܲܢ ܫܠܵܡܵܐ ܐܸܠܵܝܗܝ؛ ܘܗܘܼܩܹܐܠܹܗ ܐܸܠܵܝܗܝ ܗܹܡܸܙܡܵܢ ܒܵܬ݇ܪ ܗܹܡܸܙܡܵܢ ܟܠ ܡܸܢܕܝܼ ܕܥܒܼܸܕܠܹܗ ܐܲܠܵܗܵܐ ܓܵܘ ܛܵܝܸܦܹ̈ܐ ܒܚܸܠܡܲܬܹܗ. 20ܘܟܲܕ ܫܡܸܥܠܗَܘܿܢ ܠܫܘܼܒܸܚܠܗَܘܿܢ ܐܲܠܵܗܵܐ؛ ܘܐ݇ܡܸܪܗܘܿܢ ܐܸܠܹܗ؛ ܒܸܚܙܵܝܵܐ ܝ݇ܘܸܬ؛ ܐܲܚܘܿܢܲܢ؛ ܟܡܵܐ ܐܲܠܦܹ̈ܐ ܕܝܼܗ݇ܘܼܕܵܝܹ̈ܐ ܐܝܼܬ ܒܲܝܗܘܼܕܼ ܐܵܢܝܼ ܕܗܘܼܡܸܢܹܐ ܝ݇ܢܵܐ؛ ܘܐܲܢܹܐ ܟܠܵܝܗܝ ܛܲܢܵܢܹ̈ܐ ܕܢܵܡܘܿܣܵܐ ܝ݇ܢܵܐ. 21ܐܝܼܢܵܐ ܦܸܫܠܹܗ ܐ݇ܡܝܼܪܵܐ ܐܸܠܵܝܗܝ ܒܘܼܬܼ ܕܝܼܘܼܟܼ؛ ܕܡܵܠܘܿܦܹܐ ܝ݇ܘܸܬ ܟܠܵܝܗܝ ܝܗ݇ܘܼܕܵܝܹ̈ܐ ܕܓܵܘ ܛܵܝܸܦܹ̈ܐ ܕܦܵܪܩܝܼ ܡ̣ܢ ܡܘܼܫܹܐ ܟܲܕ ܒܹܐܡܵܪܵܐ ܝَܘܸܬ ܕܠܵܐ ܓܵܙܪܝܼ ܒܢܘܿܢܲܝ̈ܗܝ؛ ܘܠܵܐ ܗܵܘܝܼ ܒܸܚܕܵܪܵܐ ܒܥܵܕܲܬܹ̈ܐ ܕܢܵܡܘܿܣܵܐ. 22ܡܘܼܕܝܼ ܝ݇ܠܵܗ̇ ܗܲܕܟܼܵܐ؛ ܗܲܪ ܒܸܬ ܫܵܡܥܝܼ ܕܐ݇ܬܹܐܠܘܼܟܼ ܠܲܐܟܼܵܐ. 23ܥܒܼܘܿܕ ܡܸܢܕܝܼ ܕܐܵܡܪܵܚܠܘܼܟܼ. ܐܝܼܬ ܠܟܸܣܠܲܢ ܐܲܪܒܥܵܐ ܐ݇ܢܵܫܹ̈ܐ ܕܢܕܝܼܪܹ̈ܐ ܝ݇ܢܵܐ ܕܦܵܝܫܝܼ ܕܸܟܼܝܹ̈ܐ. 24ܠܵܒܸܠ ܠܗ݇ܘܿܢ ܘܕܵܟܼܝܼ ܓܵܢܘܼܟܼ ܥܲܡܵܝܗܝ؛ ܘܚܵܪܸܓ̰ ܥܲܠܵܝܗܝ ܚܲܪ̈ܓ̰ܠܸܓܹܐ ܕܓܲܪܥܝܼ ܪܹ̈ܫܵܝܗܝ؛ ܘܒܸܬ ܦܵܝܫܵܐ ܝܕܥܝܼܬܵܐ ܠܟܠ ܐ݇ܢܵܫܵܐ؛ ܕܡܸܢܕܝܼ ܕܦܸܫܠܹܗ ܐ݇ܡܝܼܪܵܐ ܒܘܼܬܼ ܕܝܼܘܼܟܼ ܕܘܼܓܠܵܐ ܝ݇ܠܹܗ؛ ܘܐܲܢ݇ܬ ܒܸܚܕܵܪܵܐ ܝَܘܸܬ ܒܪܹܐܙܵܐ ܒܓܵܢܘܼܟܼ ܒܸܢܛܵܪܵܐ ܝَܘܸܬ ܠܢܵܡܘܿܣܵܐ. 25ܐܝܼܢܵܐ ܒܘܼܬܿ ܕܐܵܢܝܼ ܕܗܘܼܡܸܢܗ݇ܘܿܢ ܡ̣ܢ ܛܵܝܸܦܹ̈ܐ؛ ܐܲܚܢܲܢ ܟܬܸܒܼܠܲܢ؛ ܕܗܵܘܝܼ ܒܸܢܛܵܪܵܐ ܓܵܢܵܝܗܝ ܡ̣ܢ ܕܒܼܝܼܚܵܐ؛ ܘܡ̣ܢ ܙܵܢܝܘܼܬܵܐ؛ ܘܡ̣ܢ ܚܢܝܼܩܵܐ؛ ܘܡ̣ܢ ܕܸܡܵܐ. 26ܗ̇ܝܓܵܗ ܦܵܘܠܘܿܣ ܠܘܼܒܸܠܹܗ ܠܐܵܢܝܼ ܐ݇ܢܵܫܹ̈ܐ ܒܝܵܘܡܵܐ ܐ݇ܚܹܪ݇ܢܵܐ؛ ܘܕܘܼܟܼܹܐܠܹܗ ܓܵܢܹܗ ܥܲܡܵܝܗܝ؛ ܘܥܒܼܸܪܹܗ ܠܗܲܝܟܠܵܐ؛ ܟܲܕ ܡܲܕܥܘܼܝܹܐ ܬܲܡܵܡܵܬܘܼܬܵܐ ܕܝܵܘܡܵܢܹ̈ܐ ܕܕܵܟܼܵܝܬܵܐ؛ ܗܲܠ ܕܦܵܐܹܫ ܗَܘܵܐ ܡܘܼܩܪܸܒܼܵܐ ܩܘܼܪܒܵܢܵܐ ܡ̣ܢ ܓܹܒܵܐ ܕܟܠ ܚܲܕَ ܡܸܢܵܝܗܝ. 27ܘܟܲܕ ܡܛܹܐܠܹܗ ܝܵܘܡܵܐ ܕܫܲܒܼܥܵܐ؛ ܝܗ݇ܘܼܕܵܝܹ̈ܐ ܕܡ̣ܢ ܐܵܣܝܼܵܐ ܩܲܡ ܚܵܙܹܐܠܹܗ ܓܵܘ ܗܲܝܟܠܵܐ؛ ܘܫܓܼܸܫܠܗܘܿܢ ܥܲܠܘܼܗܝ ܟܠܹܗ ܛܵܝܸܦܵܐ؛ ܘܕܪܹܐܠܗ݇ܘܿܢ ܥܲܠܘܼܗܝ ܐܝܼܕܵܬܹ̈ܐ؛ 28ܟܲܕ ܡܲܩܘܸܚܝܼ ܗَܘܵܐ ܐ݇ܢܵܫܹ̈ܐ ܒܢܲܝ̈ ܝܼܣܪܵܝܹܠ؛ ܗܲܝܸܪܘܿܢ؛ ܐܵܗܵܐ ܝ݇ܠܹܗ ܐ݇ܢܵܫܵܐ ܕܕܲܪܩܘܼܒܼܠ ܕܛܵܝܸܦܵܐ ܕܝܼܲܢ ܡܵܠܘܿܦܹܐ ܝ݇ܠܹܗ ܠܟܠܵܝܗܝ ܒܟܠ ܕܘܼܟܵܐ؛ ܘܕܲܪܩܘܼܒܼܠ ܕܢܵܡܘܿܣܵܐ؛ ܘܕܲܪܩܘܼܒܼܠ ܕܐܵܗܵܐ ܕܘܼܟܵܐ؛ ܘܐܘܼܦ ܠܝܵܘܢܵܝܹ̈ܐ ܡܘܼܥܒܼܸܪܹܗ ܓܵܘ ܗܲܝܟܠܵܐ؛ ܘܫܚܸܡܠܹܗ ܠܐܵܗܵܐ ܕܘܼܟܬܵܐ ܩܲܕܝܼܫܬܵܐ. 29ܣܵܒܵܒ ܩܵܕ݇ܡܵܝܬܵܐ ܚܸܙܝܹܐ ܗَܘܵܘ ܥܲܡܹܗ ܠܛܪܘܿܦܝܼܡܘܿܣ ܐܵܦܸܣܵܝܵܐ ܓܵܘ ܡܕܝܼܢ݇ܬܵܐ؛ ܘܒܸܚܫܵܒܼܵܐ ܗَܘܵܘ ܕܦܵܘܠܘܿܣ ܡܘܼܥܒܼܸܪܹܗ ܗَܘܵܐ ܠܗܲܝܟܠܵܐ. 30ܘܦܸܫܠܵܗ̇ ܫܓܼܝܼܫܬܵܐ ܟܠܵܗ̇ ܡܕܝܼܢ݇ܬܵܐ؛ ܘܓ̰ܡܸܥܠܹܓ ܟܠܹܗ ܛܵܝܸܦܵܐ؛ ܘܕܒܼܸܩܠܗ݇ܘܿܢ ܠܦܵܘܠܘܿܣ ܘܓܪܸܫܠܗ݇ܘܿܢ ܐܸܠܹܗ ܠܒܲܕܲܪ ܡ̣ܢ ܗܲܝܟܠܵܐ؛ ܒܗ̇ܝ ܫܲܥܬܼܵܐ ܦܸܫܠܗَܘܿܢ ܕܒܼܝܼܪܹܐ ܬܲܪ̈ܥܵܢܹܐ. 31ܘܟܲܕ ܒܸܒܥܵܝܵܐ ܗَܘܵܘ ܟܸܢܫܵܐ ܠܸܩܛܵܠܹܗ؛ ܡܛܹܐܠܹܗ ܚܲܒܪܵܐ ܠܪܲܒܐܲܠܦܵܐ ܕܚܲܝܠܵܘܵܬܹ̈ܐ ܕܪ̈ܗَܘܿܡܵܝܹܐ؛ ܕܟܠܵܗ̇ ܡܕܝܼܢَܬܵܐ ܫܓܝܼܫܬܵܐ ܗَܘܵܐ. 32ܒܗ̇ܝ ܣܲܥܲܬܿ ܠܘܼܒܸܠܹܗ ܠܩܸܢܛܪ̈ܘܿܢܵܐ ܕܲܚܫܹ̈ܐ؛ ܘܪܚܸܛܠܗܘܿܢ ܥܲܠܵܝܗܝ؛ ܘܟܲܕ ܚܙܹܐܠܗ݇ܘܿܢ ܠܪܲܒܐܲܠܦܵܐ ܘܠܕܲܚܫܹ̈ܐ؛ ܫܠܹܐܠܗ݇ܘܿܢ ܡ̣ܢ ܠܸܡܚܵܝܵܐ ܠܦܵܘܠܘܿܣ. 33ܘܩܘܼܪܒܸܢܹܗ ܠܟܸܣܠܹܗ ܠܪܲܒܐܲܠܦܵܐ ܘܕܒܼܸܩܠܹܗ؛ ܘܦܩܸܕܠܹܗ ܕܐܵܣܪܝܼܠܹܗ ܒܬܲܪ̈ܬܵܝܗܝ ܫܸܫ̈ܠܵܬܵܐ؛ ܘܒܵܩܸܪ ܗَܘܵܐ ܕܡܵܢܝܼ ܝ݇ܠܹܗ؛ ܘܡܘܼܕܝܼ ܥܒܼܝܼܕܵܐ ܝ݇ܠܹܗ؛ 34ܘܡܲܩܘܸܚܝܼ ܗَܘܵܘ ܥܲܠܘܼܗܝ ܐ݇ܢܵܫܹ̈ܐ ܡ̣ܢ ܓ̰ܵܡܵܥܲܬ ܡܸܢܕܝܼ ܡܸܢܕܝܼ ܘܡ̣ܢ ܡܲܩܘܲܚܬܵܝܗܝ ܠܹܐ ܡܵܨܹܐ ܗَܘܵܐ ܠܝܼܕܵܥܝܵܐ ܐܵܝܢܝܼ ܣܲܪܲܣܬ ܝ݇ܠܵܗ̇؛ ܘܦܩܸܕܠܹܗ ܕܠܵܒܠܝܼ ܠܹܗ ܠܩܲܠܥܵܐ. 35ܘܟܲܕ ܡܛܹܐܠܹܗ ܠܦܲܠܵܟܵܢܹ̈ܐ؛ ܩܲܡ ܛܵܥܢܝܼ ܠܹܗ ܕܲܚܫܹ̈ܐ؛ ܡ̣ܢ ܙܲܪܒ ܕܛܵܝܸܦܹ̈ܐ؛ 36ܣܵܒܵܒ ܕܒܹܐܬܵܝܵܐ ܗَܘܵܘ ܒܵܬ݇ܪܹܗ ܒܘܼܫܵܝ ܕܛܵܝܸܦܵܐ؛ ܘܡܲܩܘܸܚܝܼ ܗَܘܵܘ؛ ܫܩܘܿܠ ܠܹܗ. 37ܘܟܲܕ ܡܛܹܐܠܹܗ ܦܵܘܠܘܿܣ ܠܸܥܒܼܵܪܵܐ ܠܩܲܠܥܵܐ؛ ܐَܡܸܪܹܗ ܠܪܲܒܐܲܠܦܵܐ؛ ܕܲܣܬܘܼܪ ܐܝܼܬܠܝܼ ܠܗܲܡܙܘܼܡܹܐ ܥܲܡܘܼܟܼ؛ ܘܗ̇ܘ ܐَܡܸܪܹܗ ܐܸܠܹܗ؛ ܠܸܫܵܢܵܐ ܕܝܵܘܢܵܝܹ̈ܐ ܟܹܐ ܝܵܕܥܸܬ؛ 38ܠܹܐ ܝ݇ܘܸܬ ܐܲܢ݇ܬ ܗ̇ܘ ܡܸܨܪܵܝܵܐ؛ ܕܡܩܵܕ݇ܡ ܕܐܲܢܹܐ ܝܵܘܡܵܢܹ̈ܐ ܡܘܼܫܥܸܫܠܘܼܟܼ ܘܦܘܼܠܸܛܠܘܼܟܼ ܠܒܲܪܝܼܵܐ ܐܲܪܒܥܵܐ ܐܲܠܦܹ̈ܐ ܓܲܒܼܪܹ̈ܐ ܩܵܛܘܿܠܹ̈ܐ؛ 39ܐَܡܸܪܹܗ ܐܸܠܹܗ ܦܵܘܠܘܿܣ؛ ܐܵܢܵܐ ܓܲܒܼܪܵܐ ܝܗ݇ܘܕܵܝܵܐ ܝ݇ܘܸܢ؛ ܡ̣ܢ ܛܲܪܣܘܿܣ ܕܩܝܼܠܝܼܩܝܼܵܐ ܡܕܝܼܢَܬܵܐ ܝَܼܕܸܥܬܵܐ ܕܒܝܼܵܗ̇ ܒܸܪܝܵܐ ܝܘܸܢ؛ ܒܸܒܥܵܝܵܐ ܝ݇ܘܸܢ ܡܸܢܘܼܟܼ ܗܲܒܼ݇ܠ ܠܝܼ ܕܲܣܬܘܼܪ ܠܗܲܡܙܘܼܡܹܐ ܠܛܵܝܸܦܵܐ. 40ܘܟܲܕ ܝܘܼܗَܒܼܸܠܹܗ ܕܲܣܬܘܼܪ ܐܸܠܹܗ؛ ܦܵܘܠܘܿܣ ܟܲܕ ܟܸܠܝܵܐ ܥܲܠ ܦܵܠܵܟܵܢܹ̈ܐ؛ ܡܘܼܫܥܸܫܠܹܗ ܠܛܵܝܸܦܵܐ ܐܝܼܕܹܗ؛ ܘܟܲܕ ܗ݇ܘܹܐܠܵܗ̇ ܫܸܠܝܘܼܬܵܐ ܓܘܼܪܬܵܐ؛ ܗܘܼܡܙܸܡܠܹܗ ܥܲܡܲܝܗܝ ܒܠܸܫܵܢܵܐ ܕܥܸܒܼܪ̈ܵܝܹܐ؛ ܘܐَܡܸܪܹܗ ܐܸܠܵܝܗܝ.